«Малады фронт» распачынае кампанію «За — беларускую мову!»

19 верасьня «Малады фронт» распачынае шырокую грамадзкую кампанію па беларусізацыі.

Мэта, якую ставяць перад сабою арганізатары кампаніі «За — беларускую мову» — дамагчыся беларусізацыі ўсіх сфэраў грамадзкага жыцьця Беларусі, а найперш сфэры адукацыі. Бо, як зазначаецца ў адмысловым звароце ў дзяржаўныя ворганы, колькасьць беларускамоўных школьнікаў толькі за апошнія тры гады зьменшылася на 5%, а абітурыентаў — на 8%.

Асноўным сродкам рэалізацыі кампаніі «За — беларускую мову» зьяўляцца збор подпісаў пад зваротам у дзяржаўныя інстытуты ўлады з патрабаваньнямі забясьпечыць фактычную роўнасьць беларускай мове з расійскай. У межах кампаніі плянуецца таксама шэраг вулічных і адукацыйных мерапрыемстваў.

Пяцімесяцовая кампанія мае быць завершана 21 лютага — у Міжнародны дзень роднай мовы. 21 лютага «Малады фронт» плянуе перадаць ня менш за 50 000 подпісаў у вышэйшыя дзяржаўныя структуры: парламент, урад, Адміністрацыю прэзыдэнта і шэраг міністэрстваў.